*** هربت مني *** للفنانة الزجالة / فاطمة بصور

*** هربت مني ***

هربت مني...
شاربة همي...
انعصرو ف لَخوَا جُغمات
باش انكمد لجراح
الگيت سكاتي يدوي فيا
ملي تهرس لكلام
ف ضي لفجر
وجوف النجمات
ول سكات داك لبحر
همس سكاتي ب شلا كلمات:
ياك كي ديك الگمرة
لمخاوية الليل...
كنا متاومين حنا بجوج
وغالبين الطيحات؟!
تشرقني شمس
ف ظلام الخاطر
وتعزفني قصيدة
على وترات هجهوج؟!
كي طير النورس
حالف يحلق ف سما الروح
مونس الخاطر ب داك لخوا
ولداك لخوا بتغريدة ينوح؟!
يهجر البر ...يقصد لبحر
ملي صدرو بحال قلبي
بالهم يعمر؟!
يعمر ب هم مواجو فالتگلاب
گد مواج لبحر ولى گاع اكتر؟!
ياك انت علام...
ونا عودة حرانة
جيتك راكبة حلمة
مسرجة شوقك...
حيت حسيتني فروحك
همسة...
تناجي خوا الروح؟!
جيتك تقطرني دمعة
شهدة...شهدة
من عينيك اللي خانت
ملي روحي عليك هانت
دمعة حامية...
يمكن تنزل تفيض لبحر
تهيج مواجو ولى تهدا؟!
ويمكن ف شوقك تبقى؟
جيتك كيف حلمتك
تزرعني ف ضي الگمرة
وردة حمرا...
تخاوي دم الروح
اللي خلاني ل هد لبحر
ب سرك المدفون ف گلبي چ نبوح؟!
جيتك حيت حسيتك
عاشق داخل للحرب بلا عدة
جيتك هاربة مني ل هد لخوا
حيت خفت عليك
خفت عليك...
من مداد لبحر
من سكات الصخر
من ضي لقمر...
يكتبوك على جناح النورس
تعويذة للنسيان؟!
و لسان حالي يگول
الله يحد الباس
انت اللي كان قلبك
جاج يلگى عليا الباس؟!
وعلى همي نطرحو سؤال:
أش فيها يلا صبري
تحول لخاتم سليمان؟!
وفرمشة عين يجيبني ليك
قبل ما تبان هد الگمرة
حيت گمرة ليلي...
ابغيت نشوفها...
ف مومو عينيك.

الفنانةالشاعرة والزجالة فاطمة بصور: مجنونة الحرف والركح .